المعهد المصرفى المصرى
Egyptian Banking Institute
( EBI )
المعهد دا يا جماعة هوا احسن مكان فى مصر تقدر تاخد فيه اى كورس متعلق بسوق المال
سواءا كان فى مجال البنوك او فى البورصة
مبدأياً المعهد دا هو معهد تابع للبنك المركزى المصرى
ليه اربع فروع فى مصر كلها
فرع المهندسين
فرع مدينة نصر ( head office )
فرع بورسعيد
فرع الاسكندرية
وظيفة المعهد دا ايه ؟؟ بمعنى اصح بيعمل ايه ؟؟
المعهد دا تم انشاءه من البنك المركزى مباشرة سنة 91
وكان الهدف من انشاؤه هو تدريب الناس اللى شغاله اولريدى فى البنوك وتنمية مهاراتهم
بمعنى ان انا واحد من الناس شغال فى بنك مصر مثلا
فى قسم الإئتمان .. والبنك كان عايز ان انا اشتغل فى قسم الاتش ار
وبالتالى كدا انا كموظف محتاج انى اتدرب على الشغلانه الجديدة دى
وفى الحالة دى بيقوم البنك باعتنى للمعهد المصرفى عشان اخضع لكورس تدريبى مكثف هناك
وطبعا اللى بيدفع تمن الكورس هو البنك .. مش انا
بمرور الوقت اتشهر المعهد المصرفى على مستوى القطاع المصرفى واصبح كيان مستقل فى الادارة مع احتفاظ التبعية الاسمية للبنك المركزى طبعا
بمعنى ان المدير التنفيذى مستقل لكن رئيس مجلس الادارة هوا نفسه محافظ البنك المركزى
بس انا ماستفتدش حاجة برده لغاية دلوقتى .. ايه بقى ؟!!
طبعاً ماينفعش ان انا اقولك ع المعهد المصرفى من غير ماتعرف على الاقل نبذه عن نشأته وطلع ازاى عشان كدا كان لازم انك تقرا المقدمة اللى فوق دى
ماشى يا سيدى .. دلوقتى انا اقدر استفيد منه ازاى بقى ؟؟
المعهد دا زى ماقولت كان بيقدم خدماته فقط للعاملين بالقطاع المصرفى
ومع اتساع شهرته من خلال اثبات كفاءته فى التدريب امتدت برامجه التدريبية عشان تشمل الخريجين والطلبة
الخريجين والطلبة بمعنى ايه ؟؟
بمعنى ان أى خريج يقدر يقدم فيه
وأى طالب برده يقدر يقدم فيه
ياراااااجل .. تمام كدا والله .. بس انا مش مطمن .. قلبى بيقولى كدا ان فيه شروط .. ماهو مش معقول كل من هب ودب يروح مكان نضيف زى دا .. صح ؟؟
عندك حق .. المعهد حط شروط معينة لازم تتوافر فى اللى هاييجى يقدم
- بالنسبة للخريجين -
- لازم يكون تقديره التراكمى لا يقل عن جيد
- لازم يكون ليه نشاط اجتماعى او ثقافى او رياضى
- ضرورة تخطى امتحان تحديد المستوى والانترفيو
- بالنسبة للطلبة -
- لازم يكون من طلبة الفرقة الرابعة
(يعنى يكون فى تالته ومنقول لرابعة او بيدرس حاليا فى رابعة)
- لازم يكون تقديره فى السنة اللى فاتت لا يقل عن جيد
(اللى هوا تقدير سنة تالته يعنى)
- لازم يكون ليك نشاط اجتماعى او ثقافى او رياضى
- ضرورة تخطى امتحان تحديد المستوى والانترفيو
اوووووووبا .. اصبر بقى .. ايه حكاية النشاط الاجتماعى والثقافى دا ؟
دا شرط اساسى من شروط التقديم .. ان يكون فيه أى اثبات معاك انك يكونلك انشطة اجتماعية او ثقافية او رياضية
كمثال ..
نشاط اجتماعى : انك شغال مثلا فى جمعية رسالة او الاورمان
نشاط ثقافى : انك تكون مشترك فى مكتبة من المكتبات زى مكتبة مبارك او مكتبة سوزان مبارك .. الخ الخ
نشاط رياضى : انك تكون مشترك فى نادى من الأندية الرياضية المعروفة
طبعا هاتقولى واثبت دا ازاى ؟ هاقولك ان مافيش جهة من الجهات دى مش بتكون مدياك كارنيه وعليه صورتك
لو مش معاك كارنيه ودا طبعا مستحيل .. تروح للجهة اللى انت فيها وتقولهم عايز خطاب موجه للمعهد المصرفى يفيد ان ليا نشاط عندكوا
اها كدا تمام .. طب ايه بقى حكاية سنة رابعة بتاعة الطلبة دى ؟؟
بص يا سيدى .. زمااان من قيمة كام سنة كدا كان المعهد فاتحها ع البحرى
أى حد فى اي فرقة كان يقدر يروح يقدم حتى لو كان فى سنة اولى
لكن لما المعهد لاقى ان الناس اللى بتقدم من اولى وتانية وتالته مستواهم ضعيف او لسه ماتأهلوش لانهم يخضعوا لبرنامج التدريب بتاعهم قاموا مقننين العملية وخلوها لسنة رابعة بس
وبالتالى أى حد فى فرقة غير الفرقة الرابعة لا يجوز ليه التقديم
تمام يا ريسنا .. كدا انا عرفت الشروط .. ايه بقى البرامج اللى بيقدمها المعهد عشان اختار واقدم فى اللى انا عايزه ؟؟
ومين قالك انك هاتختار اساساً ؟!
كطالب او كخريج مالكش غير برنامج واحد فقط هو اللى تقدر تقدم عليه
البرنامج دا اسمه " اساسيات التعامل المصرفى "
اما باقى البرامج فهى موجودة فقط للعاملين بالقطاع المصرفى
اه .. طب وايه نظامه برنامج التعامل المصرفى دا ؟؟
دا ياسيدى برنامج شامل لكل المبادئ اللى تأهلك انك تبقى عارف البنك عموما شغال ازاى وبيعمل ايه
بمعنى اصح .. لو انت نزلت تدريب فى بنك من البنوك مش هاتاخد كل المعلومات زى اللى المعهد ممكن يديهالك
والله كويس اوى كدا .. طب وبالنسبة للناس اللى هاتدرسلنا الكورس دا ؟؟
ناس اوووووفر .. مديرين اقسام ومديرين فروع
يعنى مافيش أى كلمة تتقال عليهم او تشكك فيهم
وبالنسبة لتمن الكورس بقى ؟؟
من كام سنة كان الكورس غير مدعم
وكان النظام ان الطلبة بـ 450 جنيه والخريجين بـ 850
والاسعار دى هيا الاسعار اللى هاتلاقوها منتشرة ع النت من خلال المنتديات والمواقع وحتى كمان على منتدى الدى فى دى هنا انا شوفت موضوع قديم ومكتوب فيه الاسعار القديمة
ودا لان للاسف مافيش حد بيعمل ابديت للبيانات دى
لكن النظام دلوقتى اختلف وبقى فيه نظامين
نظام المنحة – النظام الخاص
- نظام المنحة -
ودا بدأ من اول نوفمبر 2009 لما جامعة القاهرة عملت اتفاقية شراكة مع المعهد المصرفى وبقت بتدعمه وبتقدمه كمنحة كمان
واتحول اسم البرنامج من اساسيات التعامل المصرفى الى التدريب من اجل التوظيف
ودا تمنه موحد لبرنامج الخريجين والطلبة .. 350 جنيه
ماحدش بيقدر يخشه الا طلبة الجامعات الحكومية فقط
- النظام الخاص -
ودا تمنه برده موحد لبرنامج الخريجين والطلبة .. 1300 جنيه
مش بيخشه الا طلبة الجامعات او المعاهد الخاصة
تمام كدا .. انا خريج وعايز اقدم بقى اعمل ايه ؟؟
هاتحضر اوراقك اللى هيا :
1- صورة بطاقة الرقم القومى
2- صورة كارنيه الكلية
3- اصل شهادة التخرج
4- عدد 2 صور شخصية
5- اثبات النشاط الاجتماعى او الثقافى او الرياضى
(اللى هوا الكارنيه اللى قولنا عليه)
وانا كمان طالب وعايز اقدم .. اعمل ايه انا كمان ؟؟
برده هاتحضر ورقك اللى هوا :
1- صورة بطاقة الرقم القومى
2- صورة كارنيه الكلية
3- اثبات قيد صادر من الكلية اللى انت بتدرس فيها
(واهم حاجة يكون مكتوب فى اثبات القيد انك حاصل على جيد)
4- عدد 2 صور شخصية
5- اثبات النشاط الاجتماعى او الثقافى او الرياضى
(الكارنيه اللى قولنا عليه قبل كدا)
وبعد ماجمعنا الورق بقى نعمل ايه ؟؟
هاتاخد الورق اللى انت جمعته دا وتروح بيه للمركز الرئيسى للمعهد فى مدينة نصر او فرع المهندسين ايهما اقرب ليك
ودا عنوان المعهد بتاع مدينة نصر
22 شارع انور المفتى ، خلف طيبة مول ، الدور الرابع
ودى خريطة المعهد للى عايز يعرف المعهد فين بالظبط
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 834x593 .
ودا عنوان المعهد بتاع المهندسين
56 شارع جامعة الدول العربية ، برج المهندسين الإدارى ، الدور العاشر
ودى برده خريطة المعهد عشان الناس اللى مابتحبش تسأل وبتتوه
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 839x515 .
هاتاخد الاسانسير وتطلع بيه للدور الرابع لو فرع مدينة نصر او الدور العاشر لو كان فرع المهندسين
هاتسيب بطاقتك فى الريسبشن (وماتنساش تاخدها وانت ماشى)
وتسأل اللى قاعد فى الريسبشن وتقوله عايز اقدم فى كورس اساسيات التعامل المصرفى (التدريب من اجل التوظيف)
هوا هايقولك تروح فين
هاتخش للاوضة اللى قالك عليها .. هاتتلاقى الموظف اللى بيقوم بتسجيل المتقدمين سواء طلبة او خريجين
الموظف هايديك ابليكيشن هاتملاه
(اضغط هنــــا للتحميل الابليكيشن)
وبعد ماتملاه هايقولك انزل الدور التالت عند الادارة المالية (فرع مدينة نصر) او الدور العاشر (فرع المهندسين) عشان تدفع رسوم امتحان تحديد المستوى
رسوم ؟ رسوم ايه ياعم ؟ هيا فيها امتحانات من اولها كدا ؟؟!
اه طبعا فيها امتحان .. مانا قايلك من الاول ان مش كل من هب ودب بيقدم .. دا بنك مركزى مش اى حاجة
الرسوم هى 100 جنيه .. لو عديت الامتحان والانترفيو بسلام بتقوم مكمل بقيت رسوم الكورس وتمام كدا
لو لا قدر الله سقط فى الامتحان بتروح عليك الـ 100 جنيه
طب ايه نظام الامتحان دا ؟؟
اصبر هاقولك كمان شوية ...
ماشى .. كمل ...
بتروح الادارة المالية تدفع الـ 100 جنيه بتوع رسوم الامتحان وهايديك بيه وصل اثبات دفع
هاتطلع بالوصل دا للاوضة اللى انت قدمت فيها تانى
هايقوم الموظف مصور الوصل دا وتحتفظ انت بالاصل لنفسك
و كل الورق اللى انت قدمته دا هايتدبس كله فى بعضه عشان مايضيعش
ويتحط فى دوسيه مخصوص ليك
ايه بقى نظام الامتحان ؟؟
مبدأياً انت بعد مابتقدم بتقعد فترة كدا
بتختلف من راوند للتانى على حسب
بس ماتقلقش مهما طولت مدة الانتظار هايتصلوا بيك
عشان يقولولك على ميعاد ومكان امتحانك
(عشان كدا ابقى خلى بالك اوى وانت بتكتب ارقام تليفوناتك فى الابليكيشن)
الامتحان بينقسم لجزئين .. انجليش وكمبيوتر
اولا - الانجليش :
الامتحان عموماً هوا امتحان تحديد المستوى بتاع جامعة كامبريدج
وهو نفس امتحان تحديد المستوى بتاع مركز الاميد ايست
المدة الكلية للامتحان هوا ساعتين
بيضم جزئيات متعددة وهى :
lestining: جزئية الاستماع مدتها ربع ساعة
comprehension: هايديك حوالى 10 برجرافات هاتقراهم وتجاوب الاسئلة اللى عليهم ودا مدته نص ساعة
using language: مختصة بالاكسبريشنز واستخدامات اللغة عموما ومدتها نص ساعة
Essaying: هايديك تلات مواضيع تختار منهم موضوع واحد وتكتب فيه على قد ماتقدر ودا مدته نص ساعة
ثانيا – الكمبيوتر :
الامتحان عموما تقدر تقول عليه امتحان ICDL بس مصغر شوية
بتمتحن ويندوز – وورد – اكسيل – باوربوينت – انترنت
ومدة امتحان الكمبيوتر ساعة واحدة فقط
ودا نموذج عام لبعض الاسئلة اللى جت بنفس شكل ورقة الامتحان
اللى هاتشوفها
(اضغط هنا لتحميل نموذج امتحان تحديد مستوى الكمبيوتر)
ياااه كل دا ؟! طب ادينا خلصنا الامتحان ايه الانترفيو دا بقى ؟؟
بعد مابتخلص الامتحان خلى دايما الموبايل جنبك
عشان خلال اليومين اللى جايين هايتصلوا بيك عشان يقولولك على ميعاد الانترفيو بتاعك
(وساعات بيتصلوا على التليفون الارضى)
الانترفيو دائماً بيبقى فى المركز الرئيسى اللى فى مدينة نصر
تلبس بدلتك / تلبسى تاييرك .. تلمع جزمتك / تلمعى صندلك
اهتم بالمظهر جدا وخليك كوول كدا
اهم حاجة بقى الانترفيو كان عن ايه ؟؟
عادى مجرد دردشة خفيفة كدا ومافيهاش مشاكل
بس فى النص كدا بيتقال كام سؤال من تحت عشان يشوفك متابع الاحداث الاقتصادية اللى بتحصل ولا لاء
زى مثلا
سعر الفايدة كام ؟
سعر صرف الدولار كام النهارده ؟
يعنى ايه مقاصة (Clearing) ؟
وهكذا ...
لو ماعرفتش سؤال منهم قول ماعرفش وماتفتيش
(لما تقول ماعرفش احسن من انك تتفزلك ودا عن تجربة)
متهيألى كدا خلاص بقى الموضوع خلص ...
لا ماخلصش طبعاً
لازم تبقى عارف ان مكان الدراسة الموحد هو جامعة القاهرة
ودى طبعا معلومة مهمة عشان اخواننا اللى جايين من المحافظات التانية
بمعنى ان أى حد من المحافظات التانية سواءا البحرية او الصعيد لازم يبقى عامل حسابه على الاقامة فى القاهرة لمدة شهر
ويظبط نفسه بقى من اكل وشرب واقامة ومصاريف
انت كدا بقى هاتدخلنا فى حوار جديد وهو حوار دراسة الكورس ...
طبعاً لازم تبقى عارف انت هاتعمل ايه وايه النظام دا زائد انك تبقى عارف نسب الغياب والمواعيد والامتحان .. الخ الخ
اشجينى يا معلم ...
انا هارتبهالك فى نقط عشان ماتوهش منى
1- مكان الدراسة : جامعة القاهرة – فرع المعهد بالمهندسين
2- فترة الكورس : من وإلى دى بتبقى على حسب الراوند اللى انت مقدم فيه
3- مواعيد الكورس : من 9 صباحاً وحتى 5 مساءاً
(يعنى فحت وردم من هنا للصبح)
4- المدة التقريبية للكورس : فى حدود الأسبوعين
5- مواعيد التقديم : كل 3 شهور بيتعمل راوند جديد
ومع بداية كل راوند بيتفتح باب الحجز للراوند اللى بعده وهكذا ...
6- نسب الغياب المسموحة : 20% يعنى لازم حضورك يبقى 80% من مدة الكورس كله ولو قل عن كدا يبقى كدا انت بتخاطر بنفسك انك ممكن ماتاخدش
الشهادة فى الآخر
7- الـ ID : كل طالب بيطلعله ID خاص بيه وعليه صورته واسمه والدخول والخروج بيبقى بيه طول مدة الكورس
(شكل الـ ID)
8- المادة العلمية : كل طالب بيستلم مادة علمية محطوطة فى دوسيه كبير
ومع بداية كل محاضرة بيستلم الماتيريال بتاعتها .. ودا معناه انك مش بتستلم الماتيريال كلها مرة واحده
وعموما الطلبة غير مصرح ليهم الا انهم ياخدوا الهارد كوبى .. اما السوفت الكوبى فدا غير مصرح
ولكن انا قدرت احصل على نسخة منه ودا اول بارت منها
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 860x506 .
(اضغط هنا لتحميل part1)
9- محتويات البرنامج :
البرنامج متقسم لقسمين
- Banking Operations.
- Communication Skills.
بالنسبة لقسم العمليات المصرفية بيتضمن 8 موديولات
- نمو القطاع المصرفى
(هاتدرس فيه مقدمة عن البنوك المركزية والتجارية)
- حسابات البنوك والودائع
(هاتدرس فيه حسابات البنوك بالتفصيل الممل وكل حاجة عن الودائع البنكية لما دماغك دى هاتجيب آخرها)
- الخزانة
(هاتدرس فيه أهم آداة من أدوات البنك وهى ادارة الخزانة اللى هى مسئولة عن ادارة السياسة النقدية فى البنك ككل)
(فيه بعض الناس بتتخانق على مين الأهم قسم الائتمان ولا قسم الخزانة .. بس اللى اتقالنا ان الائتمان بينصب شغله الاساسى على توفير أكبر عائد للبنوك من خلال نشاط القروض ، أما الخزانة فهو اللى بيدير سياسة البنك اصلا وبيطلع فلوس من الهوا وكل دا هاتعرفه لما تخش الكورس)
بالنسبة لمهارات الإتصال
- عملية الإتصال
(بتدرس الاتصال بيتم ازاى بين الناس بس بطريقة علمية بحتة وتقدر تستخدمها فى حياتك العملية وتحسن من علاقتك بالناس)
- خدمة العملاء
(بتدرس فيها مقدمة عن خدمة العملاء وازاى تتعامل مع العملاء والمشاكل المتعلقة بيها .. الخ الخ)
- ذوقيات العمل Bussines etiquette
(بتدرس فيه طريقة كلامك مع العملا وتقعد ازاى على المكتب بالاضافة لكيفية الاتيكيت فى التعامل مع المديرين وطريقة اللبس والاكل .. حاجات لذيذة جدا ومفيدة وبتنفع جدا لو دخلت حتت نضيفة زى الفنادق والبنوك .. الخ)
10- عدد الطلبة:
على حسب كل راوند ، بس طبعاً اعلى راوند بيبقى فيه طلبة ونسبة سقوط فى امتحان تحديد المستوى هوا الراوند بتاع شهر 7 عشان فى الاجازة وبتبقى الناس فاضية سواء الطلبة او الخريجين الجداد
اما بالنسبة للاحصائيات عموما فعدد الطلبة اللى اتخرجوا من البرنامج دا فى 2009 كانوا 170 .. وعدد اللى اتخرجوا من 2010 كانوا 350 طالب
فى المحاضرات اللى بيبقى فيها العمليات المصرفية كل الطلبة بتتجمع فى قاعة كبيرة ومحاضر هوا اللى بيشرح
اما فى المحاضرات اللى فيها مهارات الاتصال فابيتم تقسيمهم لجروبات و90% بتبقى فى فرع المهندسين عشان هناك فيه 15 قاعة مكيفة وفى قمة قمة النضافة
11- المحاضرين :
- قسم العمليات المصرفية -
كل اللى بيدرسوه بيبقوا ناس محاضرين تبع المعهد نفسه
بس اقل واحد فيهم كان ماسك مدير فرع وخبرة 30 سنة
دا غير الناس اللى هاتخشلك وكانت ماسكه مديرين اقسام فى البنوك ومديرين ماليين واستشاريين فى البنك المركزى
- قسم مهارات الاتصال -
اللى بيدرسولك ناس محاضرين برده تبع المعهد نفسه
بس معظمهم كان شغال فى اقسام الاتش آر فى شركات تقيلة
(اللى كان بيدرسلنا فى الكلاس بتاعنا كان شغال فى موبينيل)
من الاخر يعنى ناس معديَّة جدا ولازم تستفيد منهم على قد ماتقدر
لان ماعتقدش ان هاتجيلك فرصة تانية وتكون مجتمعة انك تقابل ناس بالمناصب دى
12- الامتحان:
طبعاً كتير هايقولوا ان الامتحان دا هو أهم بارت عشان الشهادة
لكن فى حقيقة الأمر الامتحان دا هو اسهل بارت فى البرنامج كله
لان انت مش بتاخد كورس عشان تخش تمتحن وتجيب تقدير
لا انت بتاخد كورس عشان تستفيد لنفسك
أى نعم انت لو مانجحتش مش هاتاخد الشهادة
بس فى ذات الوقت معنى انك مانجحتش يبقى انت كنت قاعد نايم اصلا ولا تستحق انك تاخد الشهادة فعلا
وعمووووماً
الامتحان بتمتحن فيه جزء الـ banking operations كاملاً
بتمتحن فى الـ Retail - Credit - Treasury - CBE
اما جزء الـ comm. Skills والـ SMEs
(الـ SMEs دا اختصار لكلمة small and medium enterprises) اللى هيا تمويل المشروعات المتوسطة والصغيرة وحاولوا تطلعوا على الموضوع دا كثقافة ليكوا عشان دا التوجه الجديد للبنك المركزى دلوقتى وممكن تتسألوا فيه لو روحتوا انترفيو ولا حاجة
فإذن دا مش عليه اى امتحان خالص
وبشكل عام الامتحان بيتعمل فى الهيد اوفيس فى مدينة نصر
والحضور فورمال طبعاً
الامتحان متقسم لجزئين الجزء الاول : بتمتحن فيه الـ Banking Operations
عبارة عن true or false و MCQ
الجزء التانى : بتمتحن فيه حاجة اسمها aptitude test
ودا عبارة عن شوية اسئلة IQ خفيفة مع حالات تخيلية ويشوفك هاتتصرف فيها ازاى
زى مثلا مديرك زعقلك تعمل ايه ؟ ويديك اربع اختيارات تختار واحده .. ودى طبعا مافيهاش صح او غلط بس هوا بيشوف دماغك بتفكر ازاى مش اكتر
ونصيحة ليكوا وللزمن وبنصح بيها نفسى انا كمان
خلى باااااالكوا اوى اوى اوى من امتحانات الـ aptitude دى
لان من الاخر كدا مافيش بنك فى مصر مابيعملش الامتحان دا
وبالتالى اعملوا سيرش عليها وحاولوا تحلوا اكبر قدر ممكن من النوعية دى من الامتحانات
13- زيارة البورصة :
بعد الامتحان بكام يوم كدا بيكونوا محددين مع كل الـ trainees
كذا يوم كدا بيعملوا فيهم زيارات متتالية للبورصة المصرية
بتروحوا هناك وبيدخلوكوا البورصة وبتتفرجوا على البورصة من جواها وبتشوفوا قاعة التداول والسماسرة وهما قاعدين وبيشتغلوا ازاى ومعلومات كتيرة مفيدة جدا يعنى
والزيارة مش اجبارية طبعاً .. اللى عايز يروح بيروح واللى مش عايز مش مشكلة
14- حفلة التخرج :
بيحضرها كل الناس اللى نجحت فى امتحان الفاينال بتاع الكورس
وماتقلقوش لو ميعاد حفلة التخرج اتأخر لانها غااالبا مابتتعمل فى آخر السنة فى شهر ديسمبر عشان يلموا كل الدفعات بتاعة السنة كلها فى حفلة واحده
طبعا الحفلة مكانها بيتعمل فى جامعة القاهرة داخل قاعة الاحتفالات الكبرى (اللى هيا تحت قبة الجامعة الكبيرة دى اللى اوباما قال فيها خطابه)
وقبل الحفلة طبعا بكام يوم بيكون المعهد متصل بيك وبيقولك ميعاد الحفلة فى اليوم الفلانى وتيجى فورمال ويكون معاك سي فيهات كتيرة وهانعرف ليه كمان شوية
المهم انك بتروح فى ميعاد الحفلة زى ماهايقولوك فى الاتصال
وتخش اللوبى بتاع المسرح وتسجل اسمك وتستلم الـ ID بتاعك
وطبعا مش هاتعرف تخش الحفلة من غير الـ ID يعنى ماتحاولش تجيب حد معاك وتدخله وسط الزحمة عشان هايتقفش !!
مع مراعاة حاجتين :
- الاول على الدفعات بتاعة السنة كلها بيطلع على الاستيدج بتاع المسرح وبيلقى خطاب باسم خريجى المعهد
- مع نهاية الحفلة بيتم توزيع الشهادات اولا على الاوائل وبيستلموها على الاستيدج بتاع المسرح اما باقى الطلبة الناجحين فابيستلموا الشهادة بعد ما الحفلة بتخلص خالص
ودا شكل الشهادة فى الآخر
[IMG]file:///C:/DOCUME%7E1/LeGend/LOCALS%7E1/Temp/moz-screenshot.png[/IMG][IMG]file:///C:/DOCUME%7E1/LeGend/LOCALS%7E1/Temp/moz-screenshot-1.png[/IMG]
هذه الصورة تم تصغيرها . إضغط على هذا الشريط لرؤية الصورة بحجمها الطبيعي . أبعاد الصورة الأصلية 650x468 .
15- ملتقى التوظيف Job Fair :
ودا بيتعمل بعد ما الحفلة بتخلص مبااااااااشرة
يعنى تبقى خارج من المسرح وقدامك الجوب فير على طول
الملتقى دا بيضم البنوك الراعية للبرنامج وهما تقريبا حوالى 10 بنوك
بنك مصر – القاهرة – اسكندرية – سيتى – مصر للصادرات – العربى الافريقى – التنمية الصناعية – الاهلى المصرى
كل بنك من دول بيبقى ليه زى مكتب كدا وقاعد عليه اتنين مندوبين
وحضرتك بتقوم مطلع السي في بتاعك ومقدمه لكل بنك منهم
لو انت خريج قدم السي في بتاعك على اساس انك هاتشتغل
لو طالب مافيش مشكلة برده قدم على اساس انك عايز تدريب عشان كدا ابقى اعمل حسابك على 6 او 7 سي فيهات كدا
موضوع طويل اوى صح ؟؟ انا قولت كدا برده .. بس الموضوع دا يعتبر مرجع كامل متكامل لأى حد ناوى يقدم فى الكورس دا او حتى يكون فعلا بيدرس فيه
دا غير ان انا واثق تمام الثقة ان فيه ناس بتحب تعرف أدق التفاصيل عن الكورسات دى عشان مايدفعش فلوس فى حاجة هوا مش ضامنها
لكن بناءا على تجربتى السابقة كل اللى اقدر اقوله ان فعلا كورس زى دا ماينفعش يتساب
بالاضافة لان سعر الكورس لا يتناسب تمااااما مع القيمة الحقيقية اللى هاتستفيدها منه
وان شاء الله ربنا يكتبلنا اللى فيه الخير دايماً
تنويه بس صغير كدا احب اقوله
اللى عايز ينشر الموضوع ينشره .. واللى عايز ينسب الموضوع لنفسه لما ييجى ينقله من منتدى للتانى يتفضل ينسب انا مش هاجرى وراه يعنى
بس دا لان انا عامل الموضوع بنية نشر العلم وكل واحد بيقرا المعلومة وبيستفيد منها انا باخد عليها ثواب والحمدلله.
ليست هناك تعليقات:
إرسال تعليق